மழை நாடகம்

in கவிதை

பைத்தியக்காரனோ பிச்சைக்காரனோ
இருவருமின் கலவையோ
நடைபாதையில் அமர்ந்திருக்கிறான்.
அருகிலுள்ள மூட்டையிலிருந்து
பொருட்களை எடுத்துப் பார்க்கிறான்,
வகைப்படுத்துகிறான்
என்னவோ செய்கிறான்
அவன் கழுத்தில் விழுகிறது
ஒரு சிறு மழைத் துளி
கொசு அடிப்பது போல்
சட்டெனத் துடைத்துக்கொள்கிறான்
துடைக்கும்போதே புறங்கையில்
இன்னொரு துளி விழ
மறு கையால் அதைப்
பரபரவெனத் தேய்த்துத் துடைக்கிறான்
அழுக்கு லுங்கி மூடாத தொடையில்
ஒரு துளி விழ
அதையும் உடனே அழிக்கிறான்
தூறல் வலுக்கிறது
பைத்தியக்காரனோ பிச்சைக்காரனோ
இருவருமின் கலவையோ
தலையிலிருந்து கால் வரை
பம்பரமாகச் சுழன்று
மழைத் துளிகளை
விடாமல் துடைக்கிறான்
வெறி பிடித்துத் தன்னையே
கட்டித் தழுவுவது போல்
உட்கார்ந்த இடத்தில்
தாண்டவமாடும்
அவனிடமிருந்து
ஒரு சின்ன சத்தம்கூட
வரவில்லை.

Tags: ,

Comments are closed.

© 2017 பேயோன் - Powered by Wordpress / Theme: Tabinikki

பேயோன் is using WP-Gravatar