நிறைய குறுங்கவிதைகள்

in கவிதை

இலையுதிர்காலத்துப் பேருந்து
கூரையெங்கும் இலைகளைச்
சுமந்து செல்கிறது கீரைக்காரியாய்.

*

நள்ளிரவில்
மொட்டை மாடியில்
நானும் நிலவும்
பார்த்துக்கொண்டிருந்தோம்
தாங்க முடியாத நிசப்தம்

*

ஜன்னல் கதவிடுக்கில்
சிக்கிக்கொண்ட நூலிழை
குளிர் காற்றில் பறக்கிறது
எனக்குக் கிடைத்த
இயற்கைக் காட்சி

*

கடலை மறைத்துக்கொண்டு
ஒரு கட்டுமரம்
கடற்கரையில்

*

படிக்கத் தெரியாத ஈ
புத்தகத்தைக் காலால்
தொட்டுப் பார்க்கிறது.

*

காற்றும் இல்லை
வெளிச்சமும் இல்லை
பியூரிட் வழியே சலசலக்கும் நீர்.

*

இரவா லட்டும்
தொட்டால் உதிரும்.

*

ஜன்னலும் கதவும்
திறந்திருந்தும்
குழல் விளக்கை
விடவில்லை
பட்டாம்பூச்சி

*

கடல் தொடாத
மணல்
மழையிடம்
சிக்கியது.

*

சமர்த்தாக ஒத்துழைக்கும்
எருமைக் கன்றை மழை
குளிப்பாட்டுகிறது.

*

மழைக்குக் கோவிலில்
ஒதுங்கிய கிழவி
மூலவரைப் பார்த்தபடி
சுருக்குப்பையைத்
திறக்கிறாள்

*

கோவிலை விட்டு
வெளியே வந்தால்
செருப்பைக் காணோம்
திருடியவன் கண்ணை
சாமி குத்தட்டும்

*

டி.வி.யில் பார்த்த
கார்ட்டூன் கதையை
குட்டிப் பையன்
அழகாய்த்தான்
சொல்கிறான்
ஆனால் எனக்கு
வேலை இருக்கிறது

*

யாரோ செத்ததாகக்
கேள்விப்பட்டேன்
வருந்துவதற்கில்லை
யார் மனங்களிலாவது
வாழ்ந்துகொண்டிருப்பார்

*

மணியடித்தாயிற்று
மொட்டை மாடி தரிசனம்
தெருவில் பரவி மிதக்கும்
புள்ளிக் குழந்தைகள்.

*

“அங்கிள்! அங்கிள்!!
பால்! பால்!!”
மாற்றான் மொட்டை
மாடியிலிருந்து சிறுவர்கள்
கத்துகிறார்கள் என்னிடம்
காதில் விழாதது போல்
வேகங்கூட்டி நடக்கிறேன்
நானே பந்தாகி.

*

இருபதடி தூரத்தில்
பார்த்துவிட்ட பிச்சைக்காரன்
நின்ற இடத்திலிருந்து
“ஐயா!” என்கிறான்.
நெருங்கும் வரை
பொறுமை காத்து
“இல்லை” என்கிறேன்.

*

தேங்கிய சாக்கடை
நீரின் புகழைத்
தெருவெல்லாம்
பரப்புகிறது மழைநீர்

Tags:

Comments are closed.

© 2017 பேயோன் - Powered by Wordpress / Theme: Tabinikki

பேயோன் is using WP-Gravatar