எங்காவது, யாராவது

in கவிதை

துர்க்மெனிஸ்தானில் ஒரு பணக்காரர்
தம் சொத்துகள் அனைத்தையும்
தமது ஏழைக் கிராமத்தினருக்குக்
கொடுத்துவிட்டுக் குடிசை பெயர்ந்தார்

சென்னையில் ஓர் ஆட்டோக்காரர்
பயணி மறந்து சென்ற ரூ. 5 லட்சத்தைப்
போலீசில் ஒப்படைத்துப் பயணிமகள்
திருமணம் புரிய ஏது செய்துள்ளார்

விபத்தில் ஒருவன் செத்துத் தெறித்தான்
செத்தவனின் குடும்பம்
அவன் உறுப்புகளைத் தானமளித்துப்
பத்து பேரைக் காப்பாற்றியது

துருக்கியில் சிறுவர் குழு ஒன்று
ஏதோ சுவரை இடித்து ஊரார் 150 பேருக்குள்
வெள்ளம் புகாமல் தடுத்திருக்கிறது
150 பெரிய எண்ணிக்கைதான்

ஜெர்மனியில் ஒரு பழைய கட்டிடம்
ஜப்பானில் ஓர் ஆறு
மெக்சிகோவில் ஒரு பழங்குடி
எல்லோருக்கும் சாக்லேட்

உலகெலாம் எங்காவது யாராவது
தங்களாலான அற்புதங்களை நிகழ்த்திப்
பருக்களை நீக்கியபடி இருக்கிறார்கள்
புற்றுநோய்கள் எந்தத் தொந்தரவும் இன்றி
ஜாலியாக வளர்ந்து பரவுகின்றன

எல்லாவற்றையும் ஒருவன்
பார்த்துக்கொண்டிருக்கிறான்
நான்தான் அது
ஆனால் மன்னிக்கவும்,
ஒன்றும் செய்வதற்கில்லை.

Tags: ,

Comments are closed.

© 2017 பேயோன் - Powered by Wordpress / Theme: Tabinikki

பேயோன் is using WP-Gravatar