இரு கவிதைகள்

in கவிதை

1. குறுஞ்செய்தி

என் இறப்புச் செய்தியைச் சொல்லி
எனக்கே குறுஞ்செய்தி வந்தது
அனுப்பியவரை அழைத்தேன்
“நீங்க இதுக்கெல்லாம்
வர மாட்டீங்கன்னு தெரியும்
இருந்தாலும் கூப்புடுறதுதானே மொற.”

2. ஐஸ் பெட்டி

என் சாவு வீட்டுக்குச் சென்றிருந்தேன்
லெனின் போல், தூங்கும் அழகி போல்
என்னை ஐஸ் பெட்டிக்குள் வைத்திருந்தார்கள்
எனக்கு நிற்க ஓர் இடம் கிடைத்தது
வழக்கமான காட்சிகள், வழக்கமான மனிதர்கள்
அங்கே நிற்க வேண்டியிருந்த நேரம் வரை
கதைகளும் உணர்ச்சிகளும் பகிரப்பட்டன
யாரும் என்னை அடையாளம் காணவில்லை
பெட்டிக்குள் இருந்த உடலைப் பார்க்க முயன்றேன்
என்னை மறைத்து மேலே இன்னும்
இரு பெட்டிகள் அடுக்கியிருந்தன.

Tags:

Comments are closed.

© 2017 பேயோன் - Powered by Wordpress / Theme: Tabinikki

பேயோன் is using WP-Gravatar