Archive for the ‘துண்டிலக்கியம்’ Category

திருவிழா

in துண்டிலக்கியம்

லபக்குதாசுக்குத் தாம் பேச மற்றவர்கள் கேட்பது என்றால் கரும்பு. ஆனால் நாம் பேச ஆரம்பித்தால் இசைப்பாட்டும் இளக்காரப் பேச்சுமாக நம் உரையாடலின் தலையைக் கலைத்து விடப் பார்ப்பார்.

காலையில் அவருடன் தேநீர் அருந்தியபோது ஒரு பழைய நினைவைக் கிளற முயன்றேன். டீ சாப்பிடும்போது கலகலப்பாக ஏதாவது பேச வேண்டும் அல்லவா?

“ஒருநாள் எங்க ஊர் திருவிழால காணாம போனீங்களே, ஞாபகம் இருக்கா? நான், என் உறவுக்காரங்க எல்லாம் ரெண்டு மணிநேரம் தேடிப் பாத்தா எங்கியோ ஒரு பெஞ்ச்சுல உக்காந்து திருதிருன்னு முழிச்சிட்டிருந்தீங்க…”

பாதியிலேயே குறுக்கிட்டார் லபக்குதாஸ். “யூ லாஸ்ட் மீ அட் திருவிழா.”

உறவுச் சங்கிலி

in துண்டிலக்கியம்

பிளம்பர், எலக்ட்ரீஷியன், சேவைப் பொறியாளர்கள் போன்றோர் 1 மணிக்கு வருகிறேன் என்று வாக்குறுதியளித்தால் 4 மணிக்குத்தான் வருவார்கள், அல்லது இன்னும் இரு நாட்களுக்கு வர மாட்டார்கள் என்று பொருள். எதிர்த் தரப்பு உறவினர்கள் 1 மணிக்கு வருவதாகச் சொன்னால் அதை 12 மணிக்கே நம் வீட்டில் இருந்துகொண்டுதான் சொல்கிறார்கள் என்று பொருள்.

காவிரியில் நான்

in துண்டிலக்கியம்

ஒருமுறை நான் காவிரியில் ஆனந்தமாகக் குளித்துக்கொண்டிருந்தபோது திடீரென்று வெள்ளம் பெருக்கெடுத்து நீர்மட்டம் உயர்ந்தது. அது அங்கே இங்கே ஓடாமல் எனக்கான சுனாமியாய் ஏவுகணை போல் என்னை நோக்கி வந்து அடித்து இழுத்துச் சென்றது. அது இரவு நேரம். கரையில் இருந்தவர்கள் அந்த மங்கிய ஒளியிலும் மூழ்கிக்கொண்டிருப்பது யார் என்று பார்க்க அபாயகரமான கூரைகளில், விளிம்புகளில் ஏறி நின்று சிரமப்பட்டார்கள். நீந்த வருகிறதா என்று கையைக் காலை ஆட்டிப் பார்க்க எனக்கு ஒரு பெரிய மரத் தண்டு தடையாக இருந்தது. அது தன்னை எனக்குச் சமமாகப் பாவித்து எனக்குத் துணைமை கொடுக்க முயல்வது போல் தெரிந்தது. எப்படியும் இருவரும் தத்தம் ‘ஸ்டாப்பிங்’ தேர்வுகளை மீறிக் கரையில் எங்காவது ஒதுக்கப்படுவோம் என்று அதற்குத் தெரிந்திருக்காது. அப்போது பார்த்து திடீரென்று வானில் ஒரு பயங்கர இடி இடித்தது. நான் பயத்தில் பாய்ந்து அந்த மரத் தண்டைக் கட்டிப்பிடித்துக்கொண்டேன். இல்லாவிட்டால் மூழ்கியிருப்பேன்!

ஆண் மையம்

in துண்டிலக்கியம்

இந்த ஆண்-மையச் சமூகம் பெண்ணை எப்படிப் பார்க்கிறது என்பது குறித்த விழிப்புணர்வை அதிகரிக்க வேண்டும் என்று வலியுறுத்துகிறேன். ஆனால் ரொம்ப அதிகரித்தால் நம்மைப் போன்ற நல்லவர்களும் மாட்டிக்கொள்வோம் என எச்சரிக்கிறேன்.

© 2017 பேயோன் - Powered by Wordpress / Theme: Tabinikki

பேயோன் is using WP-Gravatar