Posts Tagged ‘சர்வதேசம்’

ஒன்றுக்கும்

in கவிதை

அந்தக் காலத்தில் ஒருநாள்
தாதாயிஸ்ட் படைப்பாளிகள்
தட்டச்சுப் பொறிக்கும்
தையல் இயந்திரத்திற்கும்
மைதானத்தில் வைத்துப்
பந்தயம் நடத்தினார்கள்
ஒன்றுக்கும் ஒன்றும் ஆகவில்லை.

எங்காவது, யாராவது

in கவிதை

துர்க்மெனிஸ்தானில் ஒரு பணக்காரர்
தம் சொத்துகள் அனைத்தையும்
தமது ஏழைக் கிராமத்தினருக்குக்
கொடுத்துவிட்டுக் குடிசை பெயர்ந்தார்

சென்னையில் ஓர் ஆட்டோக்காரர்
பயணி மறந்து சென்ற ரூ. 5 லட்சத்தைப்
போலீசில் ஒப்படைத்துப் பயணிமகள்
திருமணம் புரிய ஏது செய்துள்ளார்

விபத்தில் ஒருவன் செத்துத் தெறித்தான்
செத்தவனின் குடும்பம்
அவன் உறுப்புகளைத் தானமளித்துப்
பத்து பேரைக் காப்பாற்றியது

துருக்கியில் சிறுவர் குழு ஒன்று
ஏதோ சுவரை இடித்து ஊரார் 150 பேருக்குள்
வெள்ளம் புகாமல் தடுத்திருக்கிறது
150 பெரிய எண்ணிக்கைதான்

ஜெர்மனியில் ஒரு பழைய கட்டிடம்
ஜப்பானில் ஓர் ஆறு
மெக்சிகோவில் ஒரு பழங்குடி
எல்லோருக்கும் சாக்லேட்

உலகெலாம் எங்காவது யாராவது
தங்களாலான அற்புதங்களை நிகழ்த்திப்
பருக்களை நீக்கியபடி இருக்கிறார்கள்
புற்றுநோய்கள் எந்தத் தொந்தரவும் இன்றி
ஜாலியாக வளர்ந்து பரவுகின்றன

எல்லாவற்றையும் ஒருவன்
பார்த்துக்கொண்டிருக்கிறான்
நான்தான் அது
ஆனால் மன்னிக்கவும்,
ஒன்றும் செய்வதற்கில்லை.

ஐந்து ரியோ

in சிறுகதை, புனைவு

ஆளற்ற எனோஷிமா நெடுஞ்சாலையில் ஒரு ஆள் மெல்ல நடந்து வந்துகொண்டிருந்தான். சாலையின் பக்கவாட்டு இறக்கத்தில் இருந்த புதர்களில் மறைந்திருந்த யாகுஸா கும்பல் ஒன்று அவனை வேடிக்கை பார்த்தது.

“இவனுக்கா ஐந்து ரியோ*?” என்றான் கும்பலில் ஒருவனான ஓர் அழுக்கு சாமுராய்.

“இவன் அதிவேகமாக வாள் வீசுவான்” என்றான் ஒரு யாகுஸா.

“என்னை அசிங்கப்படுத்துகிறாயா? பிச்சைக்கார நோஞ்சான் போல் இருக்கிறான். இரண்டு ரியோ கொடு, போதும்” என்று கை நீட்டினான் சாமுராய்.

“உன் இஷ்டம். ஆனால் ஜாக்கிரதை” என்று யாகுஸா இரண்டு நாணயங்களை எண்ணிக் கொடுத்தான். சாமுராய் அவற்றை வாங்கித் தன் சுருக்குப்பைக்குள் போட்டு ஆடைக்குள் வைத்துக்கொண்டான்.

நெடுஞ்சாலை மனிதன் இன்னும் நாற்பதடி தூரத்தில் வந்துகொண்டிருந்தான். சாமுராய் விடுவிடுவென்று மேட்டில் ஏறிச் சாலையை அடைந்தான். சிறிது நேரத்தில் எதிரில் வந்தவனை இயல்பாகக் கடந்த சாமுராய், சட்டென வாளை உருவினான்.

நெடுஞ்சாலை மனிதன் நொடியில் சுழன்று திரும்பித் தன் வாளை சாமுராயின் முதுகு வழியே இதயத்தில் பாய்ச்சினான். நெஞ்சிலிருந்து ரத்தம் பீறிட சாமுராய் சரிந்தான். நெடுஞ்சாலை மனிதன் வாளை மெல்ல உறைக்குள் போட்டுக்கொண்டு பயணத்தைத் தொடர்ந்தான்.

“ஐந்து ரியோ வாங்கியிருக்க வேண்டும்” என்றான் தோற்ற சாமுராய்.

*

ரியோ – பழைய காலத்து ஜப்பானியத் தங்க நாணயம்.

© 2018 பேயோன் - Powered by Wordpress / Theme: Tabinikki

பேயோன் is using WP-Gravatar